Skip to content
По краток период на привидна стабилност, инфлацијата во Северна Македонија повторно зема замав, што фрла сериозно сомневање врз способноста на Владата да води ефикасна економска политика. Најновите податоци на Државниот завод за статистика откриваат загрижувачки раст на инфлацијата во мај 2025 година – годишната стапка достигнува 3,3 проценти, што е остар скок од априлските 2,6 проценти.
Најмногу на удар се граѓаните што живеат скромно – трошоците за ресторани и хотели пораснале за шокантни 7,8 проценти, а основните прехранбени производи и безалкохолните пијалаци се поскапени за 4,1 процент. Ваквото покачување директно удира по егзистенцијата на најранливите категории граѓани, додека Владата молчи и не нуди никакви конкретни мерки за заштита на нивниот стандард.
Месечната инфлација во мај – 1,5 проценти во споредба со април – е највисока оваа година, што покажува дека ценовниот притисок не само што не стивнува, туку и се засилува. Иако има симболично намалување на цените за транспорт (-3,6%) и комуникации (-0,1%), тие се маргинални и не го менуваат општиот тренд на енормен раст кај најважните производи.
Посебно алармантни се бројките од индексот на цените на мало: споредбено со мај 2024 година, тој е повисок за 1,6 проценти. Цените на земјоделските производи – кои се основа на секојдневната исхрана – пораснале за драматични 7,6 проценти. Прехранбените производи, вклучително и индустриско-прехранбените, бележат раст од 5,3 односно 4,5 проценти, што покажува дека Владата целосно ја изгубила контролата врз основните пазари.
Во отсуство на сеопфатна економска стратегија и без активна интервенција за стабилизирање на цените, граѓаните остануваат оставени сами на себе. Наместо реформи и системска поддршка, Владата очигледно избира пасивност – по којзнае кој пат, на штета на јавниот интерес.
