Skip to content
Иран изврши нов бран напади со дронови и ракети врз Кувајт и Обединети Арапски Емирати, што дополнително ја зголеми тензијата на Блискиот Исток – и тоа само неколку часа по најавеното примирје со САД.
Според официјални информации, во Кувајт биле погодени клучни инфраструктурни објекти, вклучително нафтени постројки, електрани и постројки за вода. Воздушната одбрана пресретнала десетици дронови, но дел од нападите предизвикале материјална штета.
Во исто време, властите во ОАЕ соопштија дека нивните системи за противвоздушна одбрана пресретнале десетици ракети и беспилотни летала, а експлозиите што се слушале биле резултат на нивно уништување во воздух.
Иранските власти тврдат дека нападите се одговор на претходни удари врз нивни енергетски објекти, вклучително и рафинерија на островот Лаван.
Овие напади се дел од поширокиот конфликт што трае од крајот на февруари, кога започнаа директни судири меѓу Иран и САД со нивните сојузници. Во последните недели, Иран веќе таргетираше енергетска и воена инфраструктура во повеќе земји од Персискиот Залив, што доведе до сериозни нарушувања на снабдувањето со нафта и раст на цените на енергенсите.
И покрај договорот за привремено примирје, новите напади отвораат сериозни сомнежи дали договорот ќе се одржи и дали регионот се движи кон уште поголема ескалација.