Skip to content
Спремни сме, подготвуваме изненадувања, порача денеска иранскиот министер за надворешни работи Абас Арагчи, кој преку објава на Икс ги обвини Соединетите Американски Држави дека напаѓаат ирански нафтени и нуклеарни постројки. Пораката доаѓа во момент кога војната влегува во деветти ден, а нервозата на глобалните енергетски пазари дополнително расте.
Паралелно со ова, иранскиот функционер за национална безбедност Али Лариџани му порача на францускиот претседател Емануел Макрон дека безбедноста во Ормутскиот Теснец нема лесно да се воспостави додека траат воените дејства што, според Техеран, ги разгореле САД и Израел. Таа изјава следуваше откако Макрон најави дека Франција подготвува мисија поврзана со отворањето на пловниот коридор.
Ескалацијата веќе се прелева и врз енергетските пазари. Цените на нафтата денеска ја надминаа границата од 100 долари за барел, првпат од почетокот на војната во Украина, а проценките на пазарите се дека подолг конфликт би можел да предизвика уште посилен ценовен удар. Така, иранската порака за подготвеност и „изненадувања“ не останува само воена закана, туку станува и дел од пошироката слика на регионална нестабилност со глобални економски последици.