Истражување во Хрватска: Луѓето со поголеми приходи повеќе ги негираат климатските промени

Стравот и гневот можат да бидат многу големи мотивациони фактори. А во денешниот свет, каде што постојано се присутни разни кризи кои само се надоврзуваат една на друга, гневот сè повеќе го заменува оптимизмот како фактор што нè движи.

Истражувањето спроведено од Mindworks Lab на примерок од 500 луѓе во Хрватска даде интересен увид за тоа на кого сме лути, дали климатските промени не загрижуваат и како стоиме со емпатија кон другите луѓе и ситуации.

Загрижувачки е тоа што во Хрватска, а слично и во земјите од регионот, огромното мнозинство граѓани сè уште ги негираат климатските промени. Околу 70% од нив не го прифаќаат фактот дека се случуваат. Колку се поголеми нашите приходи, толку повеќе ќе ги негираме.

За разлика од Србија и Босна и Херцеговина, каде климатските промени се високо на скалата на гневот на граѓаните, во Хрватска на првите три места се инфлацијата, а потоа корупцијата и финансиската криза.