Италијанските медиуми го објавија името на осомничениот во „Сараево сафари“

Станува збор за 80-годишен поранешен возач на камион од местото Саворњано, во општината Сан Вито ал Таљаменто, во италијанската покраина Порденоне. Според весникот Ил Газетино, тој е осомничен за повеќекратни убиства во рамки на таканаречените „викенд снајперисти“, странски државјани кои, во периодот од 1992 до 1995 година, плаќале за да учествуваат во убиствата на цивили во Сараево.

Осомничениот, Џузепе Вегнадуцо, е под истрага на Обвинителството во Милано, кое го товари за убиство со умисла, извршено во подолг временски период и под отежнувачки околности. Според досегашните наоди, Вегнадуцо бил меѓу Италијанците кои учествувале во таканаречениот „лов на луѓе“, чијашто цел биле жени, старци и деца.

Истрагата ја води обвинителот Алесандро Гобис, во координација со специјалната единица на карабињерите РОС. При претресот на станот на осомничениот, извршен на 4 февруари, биле пронајдени два пиштола, една карабина и четири пушки.

Вегнадуцо е повикан на сослушување во Обвинителството во Милано кое треба да се одржи на 9 февруари.

Случајот доби нов импулс по сведочењето на жена чии искази ги забележа новинарката Маријана Мајорино, која претходно објавуваше истражувачки стории за наводното фалење на осомничениот со учеството во „ловот“ во Сараево.

Веста предизвика револт и неверување во локалната заедница во Сан Вито ал Таљаменто. Градоначалникот Алберто Бернава јавно го изрази своето згрозување и најави дека општината би можела да се приклучи како оштетена страна во постапката, доколку обвинувањата се потврдат.

Обвинителството во Милано води поширока меѓународна истрага за случајот, која, според најавите, ќе се прошири и пред институциите во Хаг.