Јагнињата на сточарите останаа непродадени, а министерот Трипуновски се фали на зголемени субвенции во сточарството

Додека министерот за земјоделство, Цветан Трипуновски, уверува дека неговата политика ставила „сериозен акцент“ на сточарството, сточарите од Плачковичкиот регион се соочуваат со реалноста – јагнињата останаа непродадени.

Според сточарите, откуп нема, а понудената цена од кланиците од 220 до 230 денари по килограм жива мера е неисплатлива. Приватните откупувачи нудат 300 денари, но ако ја прифатат оваа понуда, ќе останат без субвенции.

„Имам 500 овци, ама нема откуп. Јагнињата пораснаа и не ги сакаат откупувачите. Ако ги продадеме приватно, ќе ги изгубиме субвенциите“, вели сточарот Усеин Алиов.

Министерот Трипуновски тврди дека владата обезбедила повисоки субвенции – 8.000 денари по грло крава, а дополнително се зголемени субвенциите за предадено литар млеко. Но, сточарите предупредуваат дека макотрпната работа и скапата храна го прават одгледувањето неисплатливо.

„Лани јагнињата се продаваа по 300 денари за килограм, сега цената е речиси за третина пониска“, додава сточарот Кемаил Исмаилов.

Тие бараат итен откуп и фер цена од најмалку 300 денари за килограм. Се надеваат дека пред католичкиот Велигден состојбата ќе се подобри.