Skip to content
Со голем интерес и возбудена публика, пред полна сала и во присуство на дел од екипите на наградените филмови, синоќа беа доделени наградите на 24. издание на Фестивалот на европски филм Синедејс, соопшти МКЦ.
„Нашата одлука не беше лесна…“ – изјави Арсен Оремовиќ во име на двете жири-комисии кои годинава ги оценуваа филмовите во Официјалната и во СЕЕ конкуренцијата. Тој истакна дека секој филм носи силен авторски глас, локални приказни со универзална димензија и теми кои ги отвораат безвременските прашања за слободата, зрелоста, егзистенцијата и правото на избор.
Добитници во Официјалната конкуренција
- Награда за најдобар филм: „Југо Флорида“ – Владимир Тагиќ
Филм со суптилна, реалистична приказна, граден на границата меѓу сон и стварност, со фина двосмисленост и автентичен тон. - Награда за најдобро сценарио: „Вена“ – Кјара Флајшхакер
Интимен приказ на младата хероина која се бори меѓу мајчинството и зависноста, со искрени дијалози и силна емотивна тежина. - Награда за најдобра режија: „Проблематични девојки“ – Уршка Џукиќ
Режија што преку прецизни кадри и монтажни избори создава поетски и речиси експериментален свет на младата хероина. - Специјално признание: Андрија Кузмановиќ за улогата во „Југо Флорида“.
Добитници во СЕЕ конкуренцијата
- Златно сонце за најдобар филм:
„Ера“ – Петра Келменди и „Оче наш“ – Горан Станковиќ
„Ера“ обработува ретко допрена тема – украдената младост во Косово во 90-тите, додека „Оче наш“ ги поместува границите на балканската кинематографија со силна симболика и зрел режисерски ракопис. - Специјално признание:
„Месо“ – Димитрис Накос, длабока драма за согледување на менталитетот на едно грчко село.
Жирито за Официјалната конкуренција го сочинуваа Сара Климовска, Арсен Оремовиќ и Алеш Павлин, а за СЕЕ програмата – Ана Опачиќ, Фатос Бериша и Јасмина Карајловиќ.
Во осум фестивалски денови, Синедејс прикажа повеќе од 50 европски филмови, две концертни вечери и привлече повеќе од 3.000 посетители. Фестивалот е поддржан од Агенцијата за филм, Град Скопје, програмата Liveurope и програмата European Film Festivals на Креативна Европа.