Како најжешкиот град во Европа се подготвува за лето? Прават се што можат за да се оладат

Атина, најтоплиот главен град на континентална Европа, е под зголемен притисок поради приливот на туристи и екстремните летни температури.

Како што пристигнуваат повеќе посетители во текот на најпрометните месеци, властите се обидуваат да ги заштитат и жителите и туристите од екстремните горештини.

Главниот град на Грција се очекува да биде домаќин на рекордни 10 милиони посетители во 2025 година. Сепак, во текот на летото, температурите редовно надминуваат 40°C. Поради оваа причина, Акропол, најпосетуваното обележје на градот, често е затворен во најтоплиот дел од денот, со цел да се заштитат и посетителите и вработените.

Научниците предупредуваат дека Медитеранот се загрева побрзо од глобалниот просек, што ја претвора Атина во жариште.

„Туристите често ја потценуваат жештината. Тие не носат вода или капи“, изјави локалниот водич Ирис Плаитакис за Си-Ен-Ен.

Атина е веќе еден од градовите со најмалку зеленило во Европа и висока густина на население, што ја прави особено ранлива на топлотните бранови. Како резултат на тоа, градот отвори итни центри за ладење, засади дрвја, дизајнираше мали паркови со сенка и постави чешми за вода.

Градоначалникот на Атина, Харис Дукас, вели дека приспособувањето на климатските промени сега е од клучно значење.

„Градењето отпорност е прашање на опстанок“, рече тој. Целта е да се намали субјективното чувство на температура за 5°C преку урбанистичко планирање, како што е садење микрошуми и користење на материјали кои задржуваат помалку топлина.

Долгорочно, Атина работи на големи проекти како што е паркот Елиникон, кој треба да стане најголемата зелена површина во главниот град. Се гради на местото на поранешниот градски аеродром и се очекува да привлекува околу еден милион туристи годишно.

Акропол во Атина

Акропол во Атина е речиси невозможно да се посети за време на летните горештини
Но, бидејќи има се повеќе туристи, тоа дополнително ја оптоварува локалната инфраструктура, ја зголемува инфлацијата и ги зголемува цените на недвижностите.

Жителите се повеќе се загрижени за влијанието на туризмот врз нивниот секојдневен живот. Многумина стравуваат дека ќе бидат протерани од своите домови, а недостигот на вода и пожарите стануваат се почести.

Туризмот останува важен дел од грчката економија, особено по финансиската криза. Рекордни 36 милиони туристи ја посетија земјата во 2024 година, а се очекува бројката да се искачи на 40 милиони до 2030 година. Сепак, поради зголемените климатски ризици, властите сега ги охрабруваат пролетните и есенските патувања, кога времето е попријатно.

Засега градот продолжува да се прилагодува најдобро што може. На туристите им се препорачува да ги посетуваат музеите и другите атракции во најжешките часови и да го истражуваат брегот и историските области навечер, кога температурите паѓаат.