Skip to content
Навистина не очекував ваква убавина , во оваа мера, затоа што беше нешто посебно. Пречекот беше толку топол и срдечен, исполнет со почит, што ми беше прв знак дека ме чека нешто многу големо и многу убаво, што вечерва и се потврди. Публиката беше фантастична и во моментот не можам да чувствувам ништо друго освен благодарност, изјави Калиопи по настапот на 11-то издание на музичкиот фестивал „Џој фест“ во Крива Паланка.
Музичката поп икона Калиопи ,со својот настап на Градскиот плоштад во Крива Паланка , енергијата и неверојатна поврзаност со публиката направи неверојатен музички спектакл , преполн со топлина и искрени емоции, што остави силен впечаток кај сите нејзини фанови. И после 40 години музичка кариера, оваа музичка дива неприкосновено владее со сцената, а страста, динамичниот и жив настап , како што вели самата, доаѓа од љубовта , од публиката.
Признава дека навистина е потребна енергија да се издржат два часа со тоа темпо и интензитет на репертоар, зашто самиот концепт на отворено е динамичен и преовладува со огромна количина на емоции , ритам, песни кои се содржајни , но некои од нив многу тешки за пеење. Но публиката, како што вели, секогаш одново ја потсетува дека нема ништо тешко тука, туку само убавина .
„И во тој момент чувствувам како да сум неколку метри над подот, затоа што музиката и публиката ми го даваат тоа чувство, да бидам она што сум. Секогаш имам чувство дека без оглед на годините и на патот што сум го поминала, нешто ново ме чека на овој пат,“ вели Калиопи.
Иако се уште на почетокот на промоцијата, публиката во Крива Паланка веќе ги пееше и новите песни од последниот албум на Калиопи, насловен „Албум“.
„Кога ги свириме новите песни во живо, го чувствувам вниманието на публиката и тоа е неверојатно. Ова е трет концерт во Македонија каде што ги претставуваме песните од новиот албум и чувствувам дека со Ромео сме направиле повторно нешто многу убаво и сега ги жнееме успесите од тоа“, истакна Калиопи.
Настапот на музчката дива на Џојфест во Крива Паланка беше многу повеќе од добар концерт. Тоа беше празник на љубовта и емоциите што Калиопи и нејзината публика ги делат. Со енергијата и страста што ја внесува во секој настап, Калиопи продолжува да го освојува срцето на својата публика и да создава незаборавни моменти.
На втората вечер на Џој фест настапија и музичките групи Кисити, Парампашчад и Бубњиви и Пси од Црна Гора, а најновото 11 издание на овој музички фестивал го потврди неговиот издржан концепт на промоција на добра музика и забава.
