„Канџи врз институциите“: СДСМ прашува кога ќе реагира Обвинителството

Опозициската СДСМ потсетува дека и после 50 дена од објавата на скандалите со криминални тендери, нема никаква реакција од Јавното обвинителство. Од таму велат дека Обвинителството и натаму молчи пред очигледи и алармантни податоци за сомнителни јавни набавки. Прашуваат, како е можно едни исти фирми да добиваат милионски тендери а обвинителството да молчи?

„161 тендер за една фирма. 52 тендери за друга фирма. 9 милиони евра за фирма со само двајца вработени. 1,2 милиони евра за фирма блиска до ЗНАМ преку Пошта. Молкот испраќа порака дека за криминалите на власта законите не важат, а институциите се неми и под целосна контрола“, пишува во партиското соопштение.

Според нив, немањето реакција, е очигледен знак дека Мицкоски, во свои канџи, ги ставил речиси сите институции, судството, обвинителството, ‘и не само што му се под контрола туку им дели и задачи од собраниската говорница’.

„Дали сега на сите им е јасна неговата „борба“ против корупцијата“, прашува опозициската партија?

Од таму додаваат дека СДСМ ќе ја продолжи борбата против криминалот и корупцијата на власта и дека за тоа ‘сите ќе одговараат, бидејќи работата не е завршена’.