Skip to content
Новоизбраниот претседател на САД Доналд Трамп ја именуваше Каролин Левит, прес-секретарка на неговата кампања, за да служи како секретар за медиуми во Белата куќа.
Левит (27), моментално портпарол на транзицијата на Трамп, ќе биде најмладиот прес-секретар на Белата куќа во историјата. Претходно таа титула му припаѓаше на Роналд Циглер, кој имаше 29 години кога ја презеде позицијата во 1969 година во администрацијата на Ричард Никсон.
„Каролин Ливит направи феноменална работа како национален секретар за медиуми во мојата историска кампања и со задоволство можам да објавам дека ќе биде секретар за медиуми во Белата куќа“, се вели во соопштението на Трамп. „Каролин е паметна, цврста и се покажа како многу ефикасен комуникатор. Имам најголема доверба дека таа ќе биде одлична на подиумот и ќе помогне да ја пренесеме нашата порака до американскиот народ додека ја правиме Америка повторно голема“.
Левит одговори во објава на X, порано Твитер: „Ти благодарам, претседателе Трамп, што веруваше во мене. Јас сум понизена и почестена. Let’s MAGA“, акроним за „Да ја направиме Америка повторно Голема“.
Секретарот за медиуми на Белата куќа обично служи како јавно лице на администрацијата и историски одржува дневни брифинзи за новинарскиот корпус.
Трамп ги наруши тие норми во својот прв мандат, претпочитајќи да служи како свој главен портпарол. Додека беше претседател од 2017 до 2021 година, Трамп имаше четворица секретари за медиуми, но често претпочиташе директно да се занимава со јавноста, од неговите митинзи, објавите на социјалните мрежи и неговите сопствени брифинзи.
Левит ги освои симпатиите на поддржувачите на Трамп кога се судри со Кејси Хант, водителката на Си-Ен-Ен, во јуни. Таа рече дека тогаш претстојната претседателска дебата меѓу Трамп и Бајден би била „непријателска средина“ Трамп и дека модераторите Џејк Тапер и Дејна Буш биле „пристрасни“ против него во минатото.
Во жестоката размена, Хант ѝ кажа на Левит дека ќе мора да го прекине интервјуто ако продолжи да ги напаѓа нејзините колеги.
Неколку моменти подоцна Хант го заврши нивниот разговор.
Неколку недели подоцна Левит се породи со нејзиниот син, но само четири дена подоцна се врати на работа и го следеше митингот на Трамп во Пенсилванија, каде што новоизбраниот претседател преживеа обид за атентат.
За време на првиот мандат на Трамп, Левит работеше во прес-службата на Белата куќа. Таа потоа стана директорка за комуникации на Елис Стефаник, која Трамп ја избра за да служи како негов американски амбасадор во Обединетите нации.
Првите секретари за медиуми на Трамп, Шон Спајсер и Сара Хакаби Сандерс, беа познати по расправии со новинарите. Друга, Стефани Гришам, никогаш не одржа брифинг. Нејзината наследничка, Кејли МекЕнани, често држеше предавања за медиумите за време на нејзините настапи во салата за брифинг за медиуми во Белата куќа.
