Skip to content
Нападот на Иран нема да остане без одговор, порача катарското Министерство за надворешни работи на 3 март, оценувајќи дека ударите врз Катар ги преминале „сите црвени линии“ и дека не биле насочени само кон воени цели, туку и кон цивилни подрачја и објекти, вклучително и аеродромот во Доха и гасни капацитети. Доха со тоа испрати досега најостра порака по новата ескалација во Заливот.
Катарските власти соопштија дека во моментов нема отворени линии за комуникација со Иран и дека сите опции се на маса, додека приоритет останува заштитата на населението и жителите во земјата. Пораката од Доха покажува дека кризата веќе не се чита само како последица од пошироката војна во регионот, туку и како директен удар врз катарскиот суверенитет и внатрешна безбедност.
Последиците веќе се видливи и надвор од воената димензија. Катарскиот воздушен простор останува затворен, а повеќе од 8.000 транзитни патници се заглавени во земјата, додека пошироко низ Заливот десетици илјади луѓе бараат алтернативни рути за излез поради нарушениот авиосообраќај и ограничените коридори за летови.
Во исто време, катарската страна предупреди дека нападите врз гасните постројки предизвикале привремено запирање и отвораат опасност и за меѓународната економија. Во вакви околности, заканата дека нападот нема да остане без одговор добива тежина што оди подалеку од дипломатска реторика: таа сугерира дека Иран, со ударите врз заливските држави, ризикува да оттурне и досегашни внимателни актери кон поостар регионален фронт.