Катастрофа во Шпанија: Повеќе од 1.100 мртви

Смртта на 1.149 лица во Шпанија може да се припише на неодамна завршениот 16-дневен топлотен бран, проценува Институтот за истражување на јавното здравје „Карлос III“.

Системот „MoMo“ (Мониторинг на смртноста) на Институтот секојдневно го собира бројот на смртни случаи во Шпанија и го пресметува отстапувањето од очекуваната стапка на смртност врз основа на евидентираните податоци од претходните години.

Системот вклучува надворешни фактори кои можат да го објаснат отстапувањето, особено температурите објавени од Националната метеоролошка агенција (Aemet).

Системот не може да ја утврди апсолутната каузалност на смртните случаи и метеоролошките услови, но овие статистики претставуваат најдобра проценка на бројот на смртни случаи за кои топлината е одлучувачки фактор.

Веќе во јули, „МоМо“ припиша околу 1.060 смртни случаи на топлотниот бран, што претставува зголемување од 50% во споредба со јули 2024 година.

Топлотниот бран штотуку заврши во Шпанија, за време на кој беа измерени 45 степени на југот од земјата, им ја отежна работата на пожарникарите и војниците кои се борат со големи пожари, особено на запад.

Падот на температурата, заедно со очекуваните дождови во некои региони, дава надеж за подобрување на ситуацијата, иако премиерот Педро Санчез денес предупреди дека „тешките времиња сè уште претстојат“.