Skip to content
Општина Центар соопшти дека комуналните инспектори и комуналните редари во изминатите три дена изрекле вкупно 86 казни за непрописно паркирање на јавни и зелени површини, а досега се платени 24.
Контролите, според општината, се фокусирани на Дебар Маало и Градски ѕид, каде што најчесто се евидентираат вакви прекршоци, а најавено е дека засилените контроли ќе продолжат и во наредниот период.
За секое непрописно паркирано возило се остава известување за сторен прекршок. Казната изнесува 50 евра, а доколку прекршочниот платен налог се подигне и се плати во рок од осум дена, сторителот може да плати половина од изречениот износ.
„Редот мора да се почитува, а безбедноста на пешаците и заштитата на јавниот простор се наши приоритети“, изјави градоначалникот Горан Герасимовски, апелирајќи граѓаните да ги почитуваат прописите за сообраќај и комунален ред.
Засилената контрола во најоптоварените маала доаѓа во момент кога паркирањето на тротоари и зелени појаси одамна е еден од највидливите судири меѓу урбаната реалност и правилата на хартија. Казните се брза мерка за дисциплина на терен, но прашањето што останува е дали паралелно ќе се исцрта и појасна, одржлива рамка за движење и мирување во центарот на Скопје, каде секој слободен квадрат лесно станува „паркинг“ кога нема доволно функционални алтернативи.