Skip to content
Украинскиот претседател Володимир Зеленски го назначи Олег Ивашченко, поранешен шеф на Службата за надворешно разузнавање (СВР), за нов директор на Главната дирекција за разузнавање на Украина (ГУР).
„Од денес, Олег Ивашченко ќе продолжи да ѝ служи на нашата земја и да ги извршува задачите за ограничување на рускиот воен потенцијал на позицијата на украинската воено разузнавачка служба“, напиша Зеленски на својот Телеграм канал, пренесува УНИАН.
Зеленски изјави дека имал состанок со Ивашченко за време на кој новиот шеф на ГУР известил за општата безбедносна состојба во земјата и за актуелните закани со кои се соочува Украина.
Украинскиот претседател истакна дека Киев ќе продолжи да се фокусира на намалување на економскиот потенцијал на Русија, нагласувајќи дека посебно внимание ќе биде насочено кон ограничување на извозот на руска нафта и понатамошно намалување на нејзините цени.
„Колку помалку заработува агресорот, толку помалку можности има за продолжување на војната, а повеќе простор се отвора за дипломатија“, рече Зеленски.
Тој додаде дека сличен пристап се применува и во руската воена индустрија, преку нарушување на синџирите на снабдување и шеми за избегнување на санкции.
„Колку повеќе ги прекинуваме врските на агресорот со светот и неговите механизми за кршење на санкциите, толку е поголем потенцијалот за напори за завршување на војната. Благодарен сум на СВР за неговата претходна работа и информациите што ги обезбеди во оваа област“, рече Зеленски.
Да ве потсетиме дека претходно денес, Зеленски го назначи Кирило Буданов за нов шеф на својот кабинет. Според него, Буданов ќе се фокусира на безбедносните прашања, развојот на украинските одбранбени капацитети и дипломатскиот тек на преговорите.
„Мора да продолжиме да го правиме својот дел: да го победиме непријателот, да ја браниме Украина и да работиме на постигнување праведен мир. Да продолжиме да се бориме заедно за слободна и безбедна иднина на Украина“, рече Буданов.