Skip to content
Во Пјонгјанг, режимот на Ким Јонг Ун организираше помпезна церемонија за севернокорејските војници кои се враќаат од мисија во Русија, поврзана со војната против Украина. Видео-снимките на државните медиуми покажуваат како лидерот ги поздравува војниците, ги прегрнува и им оддава почит на оние кои, според официјалната верзија, загинале на фронтот. Според репортажите, деветмина севернокорејски војници се водат како загинати во борбите, а нивните портрети беа изложени на церемонијата, пред кои Ким положи бело цвеќе.
Настанот се одржа во монументалната „Куќа на културата 25 април“ во центарот на Пјонгјанг, зграда која во официјалната историја на режимот го носи датумот кога Ким Ил Сунг, првиот лидер на Северна Кореја, наводно ја започнал милициската борба против јапонската окупација. Симболиката е јасна: војниците кои се враќаат од рускиот фронт се прикажуваат како продолжување на „ослободителната традиција“ и како дел од истата историска линија на жртвување за државата.
Државната агенција КЦНА пренесе дека станува збор за 528. инженериски полк на Корејската народна армија, испратен во Русија во август 2025 година, на 120-дневна мисија во регионот Курск, во рамките на новиот договор за меѓусебна одбрана меѓу Москва и Пјонгјанг. Полкот, според севернокорејски извори, извршувал борбени и инженериски задачи – расчистување на мини и фортификација на позиции – во поддршка на руските сили во војната против Украина.
Ким Јонг Ун во говорот ги пофали војниците како „херои“ кои ја претвориле „зоната на опасност во безбедна зона“, а на деветмината загинати им додели високи државни одликувања, меѓу кои и титулата „Херој на Демократска Народна Република Кореја“ и Орден за слобода и независност. На снимките се гледа и како му приоѓа на војник во инвалидска количка, што дополнително ја нагласува драматургијата на настанот и порака за „жртвата“ во име на сојузот со Русија.
Но, зад внимателно режираните сцени стојат бројни прашалници. Западните разузнавачки извори и аналитичари тврдат дека Северна Кореја во Русија испратила илјадници војници – далеку над официјално признаената бројка – и дека вистинските загуби се значително повисоки од деветмина. Во исто време, Пјонгјанг веќе е обвинуван дека доставува артилериски гранати и ракети за руската војска, што дополнително ги крши и онака строгите санкции на Обединетите нации.
Оваа јавна, ретко отворена потврда за севернокорејско воено ангажирање на руска територија ја продлабочува загриженоста во Сеул, Вашингтон и европските главни градови. Северна Кореја досега внимателно избегнуваше детални признанија за вакви операции, иако сигналите за растечка воено-политичка соработка со Русија се присутни со месеци. Преку церемонии од ваков тип, Пјонгјанг не само што го консолидира внатрешниот култ кон армијата и лидерот, туку испраќа и порака дека е подготвен отворено да стои покрај Москва во војната против Украина – и покрај ризикот од понатамошна меѓународна изолација.