Кина оди напред! Си Џинпинг го претстави нацртот на новиот петгодишен план

Кинескиот претседател Си Џинпинг го претстави нацртот на петгодишниот план, во кој се наведени целите за земјата и владејачката Комунистичка партија.

Според кинеската новинска агенција Ксинхуа, во својот говор на отворањето на пленумот на Централниот комитет на КПК, Си „ги објасни нацрт-предлозите на раководството на партијата“ за следниот петгодишен план за национален економски и социјален развој, за периодот од 2026 до 2030 година.

Планот треба да се фокусира, како што објавува Ксинхуа, на „висококвалитетен“ развој и технолошки иновации, а воедно да се обезбеди заштита на националната безбедност и пофер и поширока распределба на придобивките од економскиот раст.

„На нашиот пат напред ќе има тешкотии и пречки, а може да се соочиме и со големи искушенија. Мора да бидеме подготвени да се соочиме со низа нови ризици и предизвици“, се вели во него.

Пленумот на Централниот комитет на КПК ќе трае четири дена и ќе собере околу 200 членови на партијата со право на глас и 170 заменик-членови на Централниот комитет.

Тоа тело ќе го одобри Нацрт-петгодишниот план, но сите детали веројатно нема да бидат објавени сè додека не биде формално одобрен на следниот годишен состанок на законодавното тело, што се очекува во март.