Skip to content
Осло ја затегна безбедносната мрежа околу јавниот превоз. По интерни тестирања, норвешкиот оператор Ruter утврди дека дел од новите кинески електроавтобуси имаат далечинска конективност за ажурирања и дијагностика што, во теорија, ѝ овозможува на фабриката производител да го изгаси возилото додека е во сообраќај. Компанијата најави построги правила при набавки, дополнителни заштитни ѕидови и преглед на секое софтверско ажурирање пред инсталација. Нема пријавено реални инциденти на намерно исклучување, но ризик-матрицата се менува, пренесува „Euronews Next“.
Тестот споредил Yutong со европски модел (VDL): кај кинеските автобуси е потврдено надворешно дигитално пристапување за over-the-air процедури; кај европските – не. Ruter ги информирал властите и иницирал мерки за намалување на поврзаноста со критичните системи за управување со батеријата и вратите за време на работа.
Ефектот се прелива низ регионот. Данските власти и најголемиот оператор Movia (со стотици кинески е-автобуси во возен парк) отворија итна сајбер-ревизија – и предупредија дека проблемот не е „само кинески“, туку на сите современи поврзани возила. Дел од мерките (како вадење SIM-картички) се одбиени бидејќи би ги исклучиле и потребните телематски услуги.
Производителите тврдат дека податоците се шифрирани и чуваат во ЕУ-центри, со пристап само со одобрение на купувачот. Но, за операторите прашањето е пошироко: кој има техничка можност да влијае врз возилото и што се случува во кризна ситуација. Затоа, новите тендери во Норвешка ќе бараат докази за сегментација на мрежата, офлајн-режим при возење и независна проверка на софтверот.
