Skip to content
Роб Јетен на 23 февруари стана најмладиот премиер во историјата на Холандија, откако кралот Вилем-Александар формално ја потврди неговата малцинска влада.
Триесет и осумгодишниот Јетен ја доведе својата прогресивна и проевропска партија D66 до изненадувачка изборна победа во октомври минатата година, со кампања во која најавуваше раскин со контроверзната претходна влада, во која доминираше националистот Герт Вилдерс. Во текстот се наведува дека неговиот политички оптимизам ќе биде ставен на брз тест, затоа што коалицијата на десниот центар нема мнозинство ниту во Долниот, ниту во Горниот дом на парламентот, па за секој поважен предлог ќе ѝ биде потребна поддршка од опозицијата.
Коалицијата составена од D66, конзервативните христијански демократи и десничарската VVD претставува редок политички експеримент во петтата најголема економија во еврозоната, со оглед на тоа што Холандија традиционално се управува преку мнозински коалиции. Во текстот се посочува и дека обезбедувањето парламентарно мнозинство станува сè потешко во фрагментираниот холандски политички пејзаж, каде што избирачките преференции често се менуваат, а центристичките партии губат поддршка.
Во најава за тешката политичка битка што го очекува, опозициски партии од левицата до десницата веќе ги критикувале плановите на коалицијата за финансирање историско зголемување на воените трошоци преку намалување на социјалната помош и средствата за здравствена заштита. Во текстот се наведува и дека Вилдерс најавил оти ќе се спротивстави на секоја иницијатива на владата на Јетен, додека повеќе помали партии изразиле загриженост за досега претставените мерки.
Меѓу клучните политики што се издвојуваат се намерата воените трошоци да се зголемат до новата цел на НАТО од 3,5 проценти од бруто-националниот доход до 2035 година, во споредба со околу два проценти денес, како и ограничување на надоместоците за невработеност, зголемување на личното учество на граѓаните во здравствената заштита и забрзување на растот на старосната граница за пензионирање во согласност со подолгиот животен век. Во истиот контекст се наведува и построг пристап кон миграцијата и азилот, тема што со години ја дели холандската политика.
Во делот за приватниот живот, Јетен во ноември 2024 година објавил оти се свршил со аргентинскиот хокеар на трева Николас Кинан, со кого е во врска од 2022 година, и дека тој е првиот јавно деклариран геј премиер на Холандија.