Skip to content
Недостигот на гориво за автобусите на ЈСП Скопје и денеска го парализира јавниот превоз, оставајќи граѓаните да се снаоѓаат како знаат. Автобусите сообраќаат минимално, а многумина одлучуваат да ги делат своите автомобили со непознати, заеднички стигнувајќи на своите дестинации.
Тие вчера во текот на попладенето се договараа на социјалните мрежи.
„Со часови чекаме на станица. Ова го нема во ниту еден нормален град. Плаќам такси, иако веќе сум си платила за јавен превоз. Кој ќе ми ги врати тие пари?“ револтирано вели една граѓанка.
Од вчера, во сообраќај се само 25 автобуси, додека останатите се паркирани поради недостаток на гориво. Претседателот на Независниот синдикат на возачите, Африм Муча, предупреди дека состојбата е алармантна, со 70% од возилата надвор од употреба. Ако ситуацијата не се подобри денес, се најавува целосен прекин на јавниот превоз.
Град Скопје вината ја префрла на владата предводена од премиерот Христијан Мицкоски, обвинувајќи за креирање на криза во јавните претпријатија. Дополнително, поништената набавка на гориво е поврзана со Бирото за јавни набавки, под раководство на ВМРО-ДПМНЕ.
СДСМ, пак, побара вонредна седница на Советот на Град Скопје. Лидерот Венко Филипче предупреди дека градот е во сериозна криза и повика на итни мерки. Доколку нема решение, СДСМ најави дека ќе го преиспита своето учество во Советот.
Советот на Град Скопје закажа итна седница за денеска во 18 часот, во обид да се изнајде излез од кризата што сериозно го погодува секојдневниот живот на Скопјани.
