Колку е навистина непристрасна „Грокипедија“ на Илон Маск?

Илон Маск ја лансираше „Грокипедија“, онлајн енциклопедија што ја уредува вештачката интелигенција, а не луѓе, како алтернатива на Википедија која, според него, е „левичарски пристрасна“. Називот потекнува од чет-ботот Grok од неговата компанија xAI, кој треба да врши проверка на фактите. Сепак, Grok во минатото има споделувано дезинформации, што создава прашања за точноста на новата енциклопедија.

„Грокипедија“ моментално има околу 900.000 статии, што е десетина од содржината на Википедија, и делумно се потпира на нејзините информации. Главната разлика е што наместо колаборативно уредување од заедницата, информациите ги обработува вештачка интелигенција без човечка редакција и без јасна транспарентност во донесувањето на одлуки.

Експертите предупредуваат дека ова создава ризик од непотполни, неконзистентни или пристрасни информации, и дека целосна непристрасност е тешко достижна без човечка интерпретација. „Грокипедија“ може да ги користи извори од Reddit и блогови повеќе од традиционалните медиуми, што дополнително го зголемува ризикот од искривување на содржината.

И покрај тоа што Маск ја претставува вештачката интелигенција како решение за пристрасност, експертите се согласуваат дека транспарентноста и признавањето на грешките остануваат клучни за доверливост и точност. Целта треба да биде балансиран и објективен приказ, што засега „Грокипедија“ веројатно не го обезбедува во целост.