Skip to content
Одлуката којашто ја донесе Демократски сојуз не претставува никакво нарушување на силината и на стабилноста на владиното мнозинство, оцени премиерот Димитар Ковачевски.
Тој посочи пример – вчера биле изгласани многу важни закони, како што се оние поврзани со „Отворен Балкан“, за слободно движење на луѓето, но и Договорот за Фронтекс, со кој македонскиот јазик за првпат стана дел од официјалните јазици на ЕУ.
-Она што го ветивме – го остваривме, и тоа го ратификуваше Собранието. Ме радува што Демократскиот сојуз кажа дека останува на европскиот пат и на поддршка на такви одлуки, што не можеше да се потврди до сега во пракса, освен декларативно, бидејќи видовме дека и вчера пратеникот од Демократскиот сојуз, за жал, не го гласаше договорот Фронтекс. Меѓутоа ќе има можност во иднина своите декларации да ги покаже и во пракса. Тој тоа го најави во петокот кога имавме разговор со него, меѓутоа сакаа да го соопштат самите. Јас очекувам дека нивните функционери веќе во текот на денешниот ден ќе ги поднесат своите оставки, тука пред сè мислам на заменик министерот за локална самоуправа. Се надевам дека како искусен политичар господинот Трајанов нема да се доведе во ситуација како Мицкоски да стане заложник на Апасиев, и нормално дека ние како Влада, како коалициона Влада и како парламентарно мнозинство остануваме отворени за сите политички партии, за сите поединци и за сите организации што се за продолжување на европскиот пат на државата и за полноправно зачленување во ЕУ, рече Ковачевски.
Тој додаде дека владиното мнозинство е силно и стабилно, а реконструкцијата на Владата ќе помине со над 64 гласови.
-Јас и вчера кажав дека реконструкцијата која ја поднесов не беше водена од персонални и кадровски побуди, туку од тоа државата да има стабилно мнозинство кое ќе може да ги носи економските закони, кое ќе може да носи правосудни закони, односно реформи во сите значајни области во државата, и притоа да не биде блокирано од опозицијата со оглед на тоа дека тое е единствено нешто што опозицијата го прави во изминатите 2 години. Сметам дека сите владини партнери се за такво ефикасно работење на Собранието и дека внесувањето на Алијанса, која има 8 пратеници, ќе го зацврсти мнозинството и ќе може многу поефикасно да се носат законите кои значат реформи и унапредување на државата, но и животниот стандард на граѓаните во сите области, заклучи премиерот.
