Skip to content
Премиерот Димитар Ковачевски, во интервју за „360 степени“, говорејќи за уставните измени кажа дека прво мора да се напишат амандманите за потоа граѓаните да можат да се уверуват „за што се работи“.
-За тоа се потребни експерти да бидат ангажирани во текот на летниот период кој што ќе ги напишат амандманите во однос на вметнувањето на други граѓани кои што се самоопределуваат различно од оние кои што веќе се запишани во Уставот, Хрватите, Црногорците, Бугарите, меѓутоа исто така интерес изразија, и тоа е добро според мене и Евреите и Торбешите, еѓипќаните кои што се дел тука од нас. За мене најдобар е примерот со Хрватска, јас често разговарам со Г. Пленковиќ, Хрватска има 24 народи кои што се вклучени во хрватскиот устав и тоа го зголемува и богатството и силината на хрватското општеството, рече Ковачевски.
Тој додаде дека со оглед на тоа дека верува во остварување на целта, работи на остварување на одредена цел.
-Ако погледнете што се е направено во мандатот на оваа Влада во 12 месеци и во делот на економијата и справувањето со енергетската криза. Најголемиот пакет антикризни мерки оценет според Светска банка и почеток на преговори со Европската унија кои 17 години беа заглавени мислам дека ова е целта која што исто така заедно мораме да ја оствариме, рече Ковачевски.
Тој повтори дека во земјата на политички план постојат два концепта.
-Едниот концепт е за европска Македонија, политички партии, организации, институции кои што се за европска Македонија и придвижување на нашата држава во семејството на европските држави. Затоа што нашите граѓани, сегашни, идни генерации заслужуваат да живеат во земја членка на ЕУ, меѓутоа тука дома во нашата држава, а не во некоја земја во туѓина на ЕУ. Затоа што нашите граѓани заслужуваат да имаат европски пат, постојат низа објаснувања и низа на причини зоштои ни е потребно зачленувањето во ЕУ. И еве ќе ви дадам една споредба само, нашите граѓани веќе почнуваат да заминуваат на работа во Чешка, Словачка, Полска што не било замисливо порано, бидејќи ние сме имале повисок стандард од нив. Но, самото членство на овие држави во ЕУ го издигна животниот стандард на неколку ката повисоко во однос на тоа што го имале. Нашите граѓани заслужуваат, ние треба да носиме одлуки баш заради иднината на сегашните и идните генерации, кажа премиерот.
Ковачевски нагласи дека од другата страна има концепт кој што е за изолација, концепт кој го предводи политичката партија Левица.
– Тие со својата популистичка и потпалувачка реторика единствено нешто што прават е изолација на државата од европските текови, дури заговараат некоја евро-азиска унија за државата, а ВМРО – ДПМНЕ бидејќи нема став единствено се заложници на ставовите на Левица. Вчера ме зачуди изјавата на претседателот Мицкоски на ВМРО – ДПМНЕ, и тоа во делот каде што тој кажува како бил доброволец и победувал во војна што значи дека тој уште малку ќе почне да се натпреварува колку луѓе убил во некаков воен конфликт. Од друга страна СДСМ има предложено Албанец за потпретседател на Влада кој што е потпретседател на нашата политичка партија. Јас сметам дека на нашата држава и треба и во октомври го имам кажано, и треба окрупнување и здружување на сите прогресивни политички партии кои што се за пристапување на С. Македонија во ЕУ. Не можам да кажам дали сум против или за, бидејќи сепак тоа е одлука на тела на политичка партија и на СДСМ и на другите коалициони партнери и на ДУИ и секако предмет на оценка и анализа во однос на очекувањата, нагласи Ковачевски.
Врз основа на разговорите на Советот за безбедност, Министерството за внатрешни работи на седница на Влада беше задолжено да обезбеди мирно и достоинствено чествување на 4.февруари, денот на раѓањето на Гоце Делчев, рече премиерот Ковачевски.
– За тоа МВР во комуникација со безбедносните служби, пред се мислам на Агенцијата за национална безбедност и Агенцијата за разузнавање, ќе ги спроведе сите потребни активности согласно законите кои што важат, согласно процедурите, рече Ковачевски.
Премиерот Ковачевски потсети дека дефинирањето на влезот во државата на странски државјани се регулира согласно Законот за странци.
-Во него има член во кој е наведено дека на државјанин на друга држава кој сака да влезе во нашата држава, а доколку претставува закана по јавниот поредок, меѓународните односи, националната безбедност или по јавното здравје може да му се забрани влез во државата. Проценката за личностите, за тајмингот ја прави МВР врз основа на информации со кои располага и врз основа на информациите кои ги споделува со безбедносните служби. Тоа ќе биде одлука на МВР. Она што сакам јас да апелирам е да бидеме мирни, достоинствени и МВР ќе направи се да биде во најдобар ред одбележано раѓањето на великанот македонската национална борба Гоце Делчев, рече Ковачевски.
