Крајно-десничарската Партија на слободата победи во Австрија

Излезните анкети покажуваат дека австриската ултра-десничарска партија победи на изборите, користејќи го стравот од имиграција и војната во Украина.

Според проекцијата на државната телевизија ORF, Партијата на слободата има поддршка од 29,1 отсто од граѓаните, а Народната партија на канцеларот Карл Нехамер има поддршка од 26,2 отсто. Социјалдемократите се на трето место со поддршка од 20,4 отсто.

Партијата на слободата ги користи стравовите на гласачите поврзани со имиграцијата, инфлацијата и Украина за да ја засили својата популарност со популистички изјави и мерки.

Херберт Кикл, поранешен министер за внатрешни работи и долгогодишен политички стратег, кој ја води Партијата на слободата од 2021 година, сака да стане нов канцелар на Австрија. Тој за себе го користел терминот „Volkskanzler“, или канцелар на народот, што го користеле нацистите за да го опишат Адолф Хитлер во 1930-тите, иако самиот Кикл ја отфрла споредбата.

Но, за да стане нов лидер на Австрија, сега ќе му треба коалициски партнер за да обезбеди мнозинство во Долниот дом на парламентот.

Повеќе од 6,3 милиони луѓе на возраст од 16 години имаа право да гласаат за новиот парламент во Австрија, членка на Европската унија која има политика на воена неутралност.

Кикл постигна пресврт од последните парламентарни избори во Австрија во 2019 година. Во јуни, Партијата на слободата тесно победи на национално ниво за првпат на изборите за Европскиот парламент, што исто така донесе придобивки за другите европски екстремно десничарски партии.

Во 2019 година, нејзината поддршка падна на 16,2 отсто по скандалот што ја собори владата во која таа беше помал коалициски партнер. Тогашниот вицеканцелар и лидер на Партијата на слободата Хајнц-Кристијан Штрахе поднесе оставка по објавувањето на тајно снимено видео во кое се чини дека му нуди услуги на наводен руски инвеститор.

Екстремната десница ја искористи фрустрацијата на гласачите поради високата инфлација, војната во Украина и пандемијата на Ковид-19.

Во својата изборна програма, Партијата на слободата повика на „ремиграција на непоканети странци“ и за постигнување по „хомогена“ нација со строга контрола на границите и суспендирање на правото на азил преку „закон за вонредни состојби“.

Гернот Бауер, новинар во австриското списание „Профил“, кој неодамна објави истражувачка биографија на лидерот на екстремната десница, рече дека под раководството на Кикл, Партијата на слободата се преселила „уште подалеку надесно“, бидејќи Кикл одби експлицитно да ја дистанцира партијата од Идентитарното движење, паневропска националистичка и екстремно десничарска група.

Бауер ја опишува реториката на Кикл како „агресивна“ и вели дека дел од неговиот јазик е намерно провокативен.

Партијата на слободата, исто така, повикува на прекин на санкциите против Русија, е многу критична кон западната воена помош за Украина и сака да отстапи од Европската иницијатива за небесен штит, проект за ракетна одбрана што го започна Германија.

Конечниот резултат ќе биде објавен во понеделник откако ќе се пребројат и поштенските гласови.

Извор: Euro News