Skip to content
На јужната граница, кај Гевгелија, полицијата повторно пресече обид за криумчарење мигранти кон внатрешноста на државата. Во вечерните часови бил запрен автомобил „пежо“ со гостиварски регистарски таблици, во кој биле откриени пет мигранти од Египет.
Според информациите од МВР, вчера околу 20:30 часот, на место викано „Нова петла“ кај Гевгелија, полициски службеници го лишиле од слобода Р.Р. (28) од селото Копаница, скопско. При проверка на возилото што го управувал, биле затекнати пет лица без документи за легален престој, за кои подоцна било утврдено дека се државјани на Египет.
Мигрантите се спроведени во Прифатно–транзитниот центар „Винојуг“ во Гевгелија, каде ќе биде сместени додека трае понатамошната постапка. За возачот Р.Р., по целосно документирање на случајот, ќе биде поднесена соодветна кривична пријава за криумчарење мигранти.
Случајот е уште една потврда дека јужниот појас кај Гевгелија останува една од клучните точки на балканската рута, каде домашните и меѓународните служби редовно бележат обиди за незаконски транспорт на мигранти кон Западна Европа.
