Кубанскиот претседател одговори на заканите: „САД немаат морален авторитет“

Кубанскиот претседател Мигел Дијаз-Канел ја отфрли заканата на Трамп дека Куба повеќе нема да добива нафта и пари од Венецуела, додавајќи дека САД немаат никаков морален авторитет да ја принудат Куба на каков било договор, пренесува Index.hr.

Американскиот претседател Доналд Трамп денес ја предупреди Куба дека ниту нафта ниту пари нема да дојдат од Венецуела, па затоа предложи комунистичкиот остров да склучи договор со САД пред да биде предоцна.

„Куба е слободна, независна и суверена нација. Никој не ни диктира што да правиме“, напиша Дијаз-Канел на платформата X.

„Куба не напаѓа, САД ја напаѓаат Куба веќе 66 години. Куба не се заканува, се подготвува и е подготвена да ја брани татковината до последната капка крв.“

Венецуела е најголемиот снабдувач со нафта на Куба, но ниту еден танкер не ги напуштил венецуелските пристаништа кон карипската земја откако американските сили го заробија венецуелскиот претседател Николас Мадуро на почетокот на јануари и ги блокираа пристаништата на членката на ОПЕК, покажуваат податоците за превозот.

Во меѓувреме, Каракас и Вашингтон напредуваат во договорот од 2 милијарди долари за испорака на до 50 милиони барели венецуелска нафта во САД, при што приходите ќе бидат депонирани на сметки надгледувани од Министерството за финансии на САД, што е голем тест за односот меѓу Трамп и привремената претседателка Делсеа Родригез.