Skip to content
– Косовскиот премиер Албин Курти денеска најави можност следната година да се напише „современ европски нацрт“ на статутот на Заедницата на општините со српско мнозинство (ЗСО).
Тој на Фејсбук, како одговор на специјалниот пратеник на Европската Унија за дијалог меѓу Белград и Приштина Мирослав Лајчак, кој неодамна изјави дека нацрт-статутот на ЗСО е внатрешна работа на Косово, рече дека може да го напише нацртот настатутот, во соработка со министерот за заедници и враќање, Ненад Рашиќ и министерот за администрација на локалната самоуправа, Елберт Красниќи.
Тој рече дека се верува дека Брисел и Лајчак „повеќе ќе се занимаваат со претседателот на Србија, Александар Вучиќ“, кој, како што рече, „ги украде изборите во Србија“, наместо да вршат притисок врз косовската јавност „со опции кои го трансформираат демократско и проевропско Косово во проблематична тема“.
„За нацрт-статутот на Заедницата ми беше кажано дека и Србија треба да го прифати, а јас понудив да го напишам врз основа на три принципи, што Вучиќ го одби. Според последната изјава на европскиот емисар Мирослав Лајчак, бидејќи нацрт-статутот е само внатрешно прашање на Косово, во следната година ќе можам да напишам модерен европски нацрт во консултација со моите министри Ненад Рашиќ и Елберт Красниќи“, напиша Курти на Фејсбук.
Во првата точка од изјавата, насловена „Нормализација на односите кон 2024 година“, Курти рече дека „апсолутен приоритет за Владата на Република Косово е безбедноста, територијалниот интегритет на државата и животот и благосостојбата на Косово и нејзините граѓани“.
Во втората точка побара да се објават заклучоците од истрагата за нападот во Бањска. „Мора веднаш да се објават заклучоците од истрагата за терористичкиот и криминален напад на 24 септември во Бањска и Звечан, кога беше убиен наредникот Африм Буњаку. Милан Радоичиќ и членовите на неговата паравоена група мора да им бидат предадени на косовските власти, напиша Курти.
Во третата точка тој побара од ЕУ и САД да воведат санкции кон Србија.
„Се надевам дека Европската Унија и САД ќе воведат санкции кон Србија, особено нејзиниот претседател Александар Вучиќ, поради непријателско и агресивно однесување и постапки кон Косово, поради ескалацијата на северот на нашата земја и напуштањето на Основниот договор“, додаде Курти, со оценка дека оваа напуштање е изразена во писмото на премиерката на Србија Ана Брнабиќ до ЕУ на 14 декември.
Во четвртиот тој побара укинување на мерките против Косово, како и на Косово да му се додели статус на земја кандидат за ЕУ и да се вклучи во Партнерството за мир со НАТО, што, според него, би ги натерало западните партнери на Косово „силно да побараат од Србија да ја спроведе својата обврска де факто да го признае Косово“.
