Лајка бара привремени домови за кучињата пред трајно вдомување

ЈП „Лајка“ денеска ја промовираше иницијативата за привремено згрижување на кучиња од прифатилиштето, со цел да се подобри нивната благосостојба и да им се зголемат шансите побрзо да добијат постојан дом.

Моделот што го предлага претпријатието значи кучето да помине извесен период во домашни услови, наместо цело време зад ограда, сѐ до моментот кога ќе биде вдомено. Според објаснувањето на „Лајка“, токму тој краток престој во дом им помага на кучињата да се социјализираат, да стекнат рутина и повторно да изградат доверба во луѓето, што директно влијае врз шансите за успешно вдомување.

За да ги охрабри граѓаните да се вклучат, „Лајка“ најавува дека ќе обезбеди храна за целото времетраење на престојот, комплетна ветеринарна грижа, стручна поддршка и насоки, како и промоција на кучето за трајно вдомување. Притоа, претпријатието нагласува дека за влез во програмата не е потребно претходно искуство, туку одговорен пристап, основни услови и подготвеност неколку недели или месеци да се биде привремен дом на животно што веќе поминало низ улица и прифатилиште.

Оваа иницијатива доаѓа во систем во кој ЈП „Лајка“ веќе е надлежно за хуман третман и контрола на популацијата на бездомни кучиња, а Град Скопје со години ги упатува граѓаните токму таму и кога пријавуваат проблем со кучиња скитници и кога сакаат да вдомат куче. Новиот повик практично ја оттурнува приказната чекор понатаму: наместо кучето директно од стационар да чека траен сопственик, сега се бара меѓуфаза во која домот ќе стане простор за ресоцијализација, а не само крајна дестинација. Заинтересираните, според објавата, можат да се пријават преку електронска пошта или преку социјалните мрежи на ЈП „Лајка“.