Skip to content
Рускиот министер за надворешни работи Сергеј Лавров планира да ја посети Малта во декември за да учествува на состанокот на Министерскиот совет на Организацијата за безбедност и соработка во Европа (ОБСЕ), објави во петокот весникот Ведомости, цитирајќи ја портпаролката на руското Министерство за надворешни работи, Марија Захарова.
Тоа ќе биде негова прва посета на земја од Европската унија откако Русија ја започна војната во Украина во февруари 2022 година.
Амбасадата на Малта во Русија потврди за Ведомости дека одлуката да се одржи состанок на Министерскиот совет на ОБСЕ на островот на 5 и 6 декември „важи за сите членки, вклучително и за Руската Федерација“.
„Делегациите на ОБСЕ редовно се информирани за напредокот на подготовките. Дополнителни практични детали, вклучително и покани, ќе бидат навремено испратени до сите делегации на ОБСЕ“, соопштија од амбасадата.
Брисел, инаку, воведе бројни санкции за Лавров, како и за остатокот од руската администрација, но ЕУ не му забрани да патува во блокот за да ги задржи отворени линиите за комуникација.
Последен пат Лавров ја посети територијата на членка на ЕУ во декември 2021 година, исто така поради состанокот на претставници на членките на ОБСЕ, кој тогаш беше организиран во Стокхолм.
На 24 февруари 2022 година, Русија започна војна на територијата на Украина за време на големата ескалација на руско-украинскиот конфликт што започна во 2014 година. Инвазијата резултираше со десетици илјади жртви од двете страни и ја предизвика најголемата бегалска криза во Европа од Втората светска војна (повеќе од 7,7 милиони Украинци ја напуштија земјата). Инвазијата предизвика и глобален недостиг на храна.
