Лебот во оваа балканска земја го плаќаат како злато, најскап е во ЕУ

Граѓаните на Хрватска секојдневно се соочуваат со пораст на цените на основните прехранбени производи, но ново истражување покажува дека хрватскиот леб поскапел далеку повеќе од просекот во Европската унија.

Иако многумина би помислиле дека причината за растот на цените е поврзана со пченицата, експертите од прехранбената индустрија укажуваат дека причините се многу подлабоки и покомплексни.

Според истражувањето спроведено од европратеничката Билјана Борзан, цената на лебот во Хрватска се зголемила дури за 60% во последните неколку години – што е за 20% повеќе од просекот на ЕУ.

Борзан отворено укажува на она што многу граѓани веќе со месеци го сомневаат:

– Постојат алчни алки во синџирот на профит кои ја користат ситуацијата. Посебен проблем претставува увозот на готови пекарски производи, кои директно ги загрозуваат домашните производители и влијаат на стабилноста на пазарот.

Дека поскапувањето на лебот веќе нема врска со цената на пченицата, потврдува и Јосип Бичвиќ, член на управата на славонската групација „Жито“, кој за РТЛ изјави:

– Цената на лебот веќе извесно време нема никаква корелација со цената на пченицата. Ако беше поинаку, минатата година ќе имавме значително поевтин леб, бидејќи пченицата беше поевтина. Наместо тоа, цените останаа високи. Очигледно денес врз нив влијаат други фактори – енергенсите, трошоците за работна сила, но веројатно и желбата за поголем профит.

На оваа состојба реагираше и министерот за економија Анте Шушњар, кој тврди дека Хрватска не е исклучок и дека веќе се преземени конкретни мерки за контрола на цените на основните прехранбени производи:

– Според нашата регулатива, цената на лебот не смее да ја надмине границата од 1,5 евра по килограм, односно 0,75 евра за половина килограм. Донесовме мерки за ограничување на цените на основните производи кои им се важни на граѓаните – порача Шушњар, нагласувајќи дека Хрватска по тоа прашање не стои полошо од другите членки на ЕУ, пренесува Дневно.

Да потсетиме, хрватската влада кон крајот на јануари донесе одлука за директни мерки за контрола на цените во малопродажбата, со која списокот на производи под надзор се прошири од 30 на дури 70 артикли. Меѓу нив се:

Леб, брашно (тип Т-550 и Т-400), палента, јачмена каша

Пахулки, двопек, тестенини, сувомеснати производи

Конзервирани производи, млечни артикли и риба

Во рамките на мерките е пропишана и максимална цена за глаткото брашно Т-550 – 0,80 евра, додека острото Т-400 е ограничено на 0,83 евра по литар.