Skip to content
Меѓу илјадниците страници дигитални материјали од архивите поврзани со Џефри Епстин, се појавуваат и пораки каде се спомнува Александар Македонски, не како дел од истрагите, туку како историска и мотивациска референца во едукативни текстови и newsletter-и што Епстин ги добивал. Во дел од овие документи, Александар се појавува како пример за лидерство, воена генијалност и младешка амбиција.
Во еден од документите е објавен текст од организацијата „The American-Israeli Cooperative Enterprise (AICE)“, испратен во март 2015 година на „тајната“ e-mail дреса поврзана со Епстин. Билтенот обработува политички и историски теми поврзани со Блискиот Исток, односите меѓу САД и Израел и регионалната безбедност. Но меѓу аналитичките текстови се наоѓа и рубриката „Fact of the Week“, каде се спомнува археолошко откритие од времето на Александар Македонски.
Според содржината, израелски спелеолози откриле златници и накит од хеленистичкиот период во пештера во регионот Галилеја. Откритието било јавно соопштено од Израелската управа за антиквитети во 2015 година. Во овој контекст, Александар Македонски се појавува како историска референца за периодот во кој датираат пронајдените предмети.
Во друг e-mail документ што бил дел од архивата се појавува и познатиот цитат што често му се припишува на Александар:
„Не се плашам од војска лавови предводени од овца, се плашам од војска овци предводени од лав.“
Овој цитат со години циркулира во мотивациски и лидерски кругови. Иако неговата автентичност не е целосно потврдена од историски извори, тој често се поврзува со имиџот на Александар како исклучителен воен стратег.
Интересно е што името на македонскиот владетел се појавува и во религиозно-поучна содржина пронајдена во истата e-mail архива. Во будистички текст за духовна дисциплина и почит кон учителите, Александар е спомнат како пример за „млад крал“ кој владеел на млада возраст. Поуката нагласува дека не треба да се потценуваат „малите нешта“, мал оган, мала змија, млад крал или млад монах, бидејќи можат да имаат големо влијание.
Експертите за дигитална форензика појаснуваат дека во истражни процеси често се прибира целосна електронска комуникација од одредени сметки. Тоа значи дека во архивите се наоѓаат и автоматски билтени, претплатнички newsletter-и и информативни пораки кои корисникот ги добивал без тие да имаат било каква поврзаност со истражните настани.
Во случајот со Епстин, овие документи покажуваат дека на неговите e-mail адреси пристигнувале разновидни содржини, од политички анализи до историски занимливости. Спомнувањето на Александар Македонски во нив е дел од пошироки образовни и културни материјали што циркулираат во јавниот интернет простор.
Историчарите забележуваат дека присуството на Александар Македонски во современи дигитални содржини не е изненадување. Неговото име со векови се користи како симбол за лидерство, воена генијалност и младешка амбиција. Дури и во 21 век, неговото наследство продолжува да се појавува во најразлични формати, од научни статии и археолошки извештаи до мотивациски пораки и духовни текстови.
Така, повеќе од два милениуми по неговото време, Александар Македонски останува историска фигура која „патува“ низ современата дигитална комуникација, понекогаш дури и во inbox-ите на контроверзни личности од модерното доба.