Skip to content
Во пресрет на Велигден, меѓу најбараните совети повторно е како јајцата да добијат силна, чиста и длабока црвена боја, без бледи дамки и нерамномерно фарбање. Еден од триковите што деновиве повторно се споделува е грчкиот начин на боење, кој се сведува на неколку едноставни чекори: јајцата прво се варат во вода со оцет, потоа црвената боја се раствора токму во дел од таа топла вода, а јајцата се оставаат подолго во течноста за да ја впијат бојата поинтензивно.
Во домашната традиција црвените велигденски јајца имаат посебно место и најчесто се подготвуваат на Велики четврток. Црвената боја се врзува со Христовата крв, а самото јајце со Воскресението, па затоа токму оваа нијанса останува најпрепознатлива и најбарана во домовите пред празникот.
Според рецептите што се пренесуваат како проверен домашен начин, клучот не е само во кесичката боја, туку во оцетот и во трпението.
Откако ќе се сварат, јајцата кратко се ладат, а потоа се враќаат во обоената течност и стојат додека не добијат јарко црвена нијанса. Во дел од рецептите за уште подлабока боја се користи и природна варијанта со лушпи од кромид и оцет, при што јајцата се оставаат во течноста сè додека не се добие темноцрвен тон. На крај, кога ќе се исушат, се премачкуваат со неколку капки масло за да добијат сјај.