Skip to content
По 13-часовна расправа, парламентот на Летонија во четвртокот одлучи земјата да се повлече од Истанбулската конвенција — меѓународен договор на Советот на Европа кој има за цел да го спречи и намали насилството врз жените.
За повлекување гласаа 56 пратеници, 32 беа против, а двајца воздржани. Ако одлуката ја потпише претседателот Едгарс Ринкевичс, Летонија ќе стане првата земја-членка на Европската унија што се откажала од оваа конвенција, која парламентот ја ратификуваше само пред една година, во ноември 2024 година.
Истанбулската конвенција стапи во сила лани и предвидува единствени стандарди за заштита на жените жртви на насилство, вклучително и семејно насилство. Сепак, конзервативни и верски групи ширум Европа ја критикуваат, тврдејќи дека „промовира родова идеологија“ и „ја поткопува традиционалната семејна структура“.
Иницијативата за повлекување ја покренаа опозициските партии во септември, а подоцна им се приклучи и Сојузот на зелените и фармерите, кој е дел од владејачката коалиција на премиерката Евика Силиња.
Премиерката Силиња, чија влада дојде на власт со ветување дека ќе ја ратификува конвенцијата, остро ја осуди одлуката:
„Оние што имаа храброст да побараат помош, денес гледаат како нивните болни искуства се користат за политички борби. Тоа е сурово,“ напиша таа на платформата X.
Меѓународните организации за човекови права, како Equality Now, предупредија дека овој потег „ја загрозува безбедноста на жените и девојчињата во Летонија“ и „ги охрабрува антиевропските и антидемократски движења во регионот“.
И покрај личното противење, претседателот Ринкевичс е законски должен да го потпише актот за повлекување.
Во пресрет на гласањето, повеќе од 5.000 луѓе протестираа во Рига против повлекувањето, додека околу дваесетина демонстранти изразија поддршка за него.
