Лоши вести за Новак Ѓоковиќ

Иако Новак Ѓоковиќ не настапи ниту на Мастерсот во Монтреал, ниту ќе игра на претстојниот во Синсинати, исходот од канадскиот турнир значително влијаеше на неговиот пласман на АТП листата.

Американецот Бен Шелтон го освои својот прв трофеј од серијата Masters 1000, совладувајќи го во финалето Русинот Карен Хачанов со 6:7 (5:7), 6:4, 7:6 (7:3). Со овој триумф, 21-годишниот Шелтон стана најмладиот Американец со Мастерс титула по Енди Родик, а од понеделник ќе биде шести на АТП листата, туркајќи го Ѓоковиќ на седмата позиција.

Оваа промена значи дека српскиот ас на претстојниот US Open би можел уште во четвртфиналето да се соочи со врвни играчи како Јаник Синер или Карлос Алкарас, што дополнително ќе му го отежни патот до титулата.

Возбудливо финале во Монтреал

Финалето понуди голема борба од првиот до последниот поен. Хачанов прв стигна до брејк во седмиот гем од првиот сет, но Шелтон врати во последен момент и израмни на 5:5. Сепак, Русинот го доби тај-брејкот со 7:5 и поведе со сет.

Во вториот сет, клучниот момент се случи во деветтиот гем кога Американецот му го одзеде сервисот на Хачанов и потоа сигурно го доби сетот. Третиот сет мина без брејк-шанси, а во решавачкиот тај-брејк Шелтон славеше со 7:3, освојувајќи ја најголемата титула во својата досегашна кариера.

Шелтон и Хачанов би можеле повторно да се сретнат во четвртфиналето на Синсинати. Во второто коло, Американецот ќе игра против победникот од дуелот Каребели (Аргентина) – Кеи Нишикори (Јапонија), додека Русинот ќе се сретне со подобриот од мечот Офнер (Австрија) – Роаје (Франција).