Мадуро пред суд во Њујорк: „Киднапиран сум“ – се изјасни за невин

Венецуелскиот лидер Николас Мадуро денеска, 5 јануари 2026, првпат се појави пред федерален суд во Њујорк по американската операција во Каракас, каде што изјави дека бил „киднапиран“ и дека, според него, и натаму е претседател на Венецуела.

Мадуро и неговата сопруга, Силија Флорес, се изјаснија за невини. Според американските обвиненија, тие се товарат за тешки кривични дела поврзани со трговија со дрога, меѓу кои и нарко-тероризам и заговор за внесување кокаин во САД, со можни казни до доживотен затвор доколку бидат осудени.

Одбраната најави дека првичната стратегија ќе биде насочена кон оспорување на легалноста на приведувањето и надлежноста на американските органи да спроведат операција на туѓа територија, а адвокатот Бери Полак се повикува и на тезата дека Мадуро има имунитет како шеф на држава. Но токму тука е јадрото на американската позиција: Вашингтон не го признава Мадуро како легитимен лидер на Венецуела, што директно ја поткопува линијата на одбрана за имунитет.

Судијата Алвин Хелерштајн го закажа следното рочиште за 17 март, а медиумите јавуваат дека Мадуро и Флорес ќе останат во притвор во Метрополитен детеншн центарот во Бруклин.

Паралелно со судската постапка, кризата во Каракас доби и нов политички слој. Синот на Мадуро, Николас Мадуро Гуера, повика на „меѓународна солидарност“ и ја опиша операцијата како опасен преседан, додека вршителката на должноста претседател, Делси Родригез, по почетните остри реакции, јавно повика на „агенда на соработка“ со САД и „почит“ кон меѓународното право.