Skip to content
Македонија во наредните денови ќе биде под влијание на нов топлотен бран кој ќе донесе стабилно, сончево и многу топло време, соопшти Управата за хидрометеоролошки работи (УХМР).
Од УХМР посочуваат дека од утре температурите ќе бидат во постепен пораст, што ќе биде особено изразено од четврток и во текот на викендот. Во повеќето места низ земјава максималните дневни температури ќе надминат 30 степени Целзиусови, а во поединечни региони ќе достигнат и до 40 степени.
Поради очекуваните високи температури, надлежните институции упатуваат апел до граѓаните да избегнуваат излегување во најжешките периоди од денот, особено од 11 до 17 часот, и да преземат соодветни мерки за заштита од сонце и топлина, вклучувајќи и внесување поголеми количества течности.
Од Министерството за здравство препорачуваат посебна внимателност кај постарите лица, хронично болните, трудниците и малите деца, кои се најранлива категорија за време на вакви топлотни бранови. Се советува престој во климатизирани простории, носење лесна и светла облека, како и ограничување на физичките активности на отворено.
Зголемените температури носат и зголемен ризик од пожари, поради што од Центарот за управување со кризи (ЦУК) апелираат граѓаните максимално одговорно да се однесуваат кон природата и да не палат оган на отворено.
