Македонската компанија Сајтрокс е ставена под санкции на САД заради учество во развојот и дистрибуцијата на шпиунски софтвер

Американското Министерство за финансии денеска објави дека санкционирало две лица и комерцијална компанија за шпионски софтвер со седиште во Грција, предводена од поранешен израелски воен офицер, која развивала, управувала и дистрибуирала технологија што се користи за таргетирање на американски владини претставници, новинари и експерти за политика.

Санкциите се насочени кон конзорциумот Интелекса, за кој САД велат дека продавал и дистрибуирал комерцијален шпионски софтвер и алатки за надзор за насочени и масовни кампањи за надзор.

Други субјекти поврзани со Интелекса – вклучително и Сајтрокс (Citrox) со седиште во Северна Македонија, Сајтрокс Холдинг ЗРТ со седиште во Унгарија и Талестрис Лимитид со седиште во Ирска – беа казнети за нивната вмешаност во развојот и дистрибуцијата на пакетот алатки познат како Предатор.

Претставници на администрацијата на Бајден изјавија дека ова е првпат Министерството за финансии да санкционира луѓе или субјекти за злоупотреба на шпионски софтвер.

Предатор му овозможува на корисникот да се инфилтрира во електронски уреди преку напади без кликнување кои не бараат интеракција на корисникот за шпионскиот софтвер да го зарази уредот. Шпионскиот софтвер, кој се користи во десетици земји, овозможи неовластено преземање податоци, следење на геолокацијата и пристап до лични податоци на компромитирани уреди.

„Денешните дејства претставуваат опиплив чекор напред во обесхрабрувањето на злоупотребата на алатките за комерцијален надзор, кои се повеќе претставуваат безбедносен ризик за Соединетите Американски Држави и нашите граѓани“, изјави Брајан Нелсон, потсекретар за тероризам и финансиско разузнавање на Министерството за финансии.