Skip to content
Утринава во австрискиот град Грац се случи незапамтена трагедија кога поранешен ученик на 22-годишна возраст упадна во училиште и според досегашните информации, уби десет лица, меѓу кои има деца и наставници. Осомничениот влегол во две училници и отворил оган, по што бил уапсен. Во болниците се лекуваат 28 повредени, а состојбата на најмалку четворица е критична; дел од жртвите се застрелани во главата.
Мајка на една од учениците сведочи дека ѝ заѕвонел телефонот додека ќерката преплашено бегала од нападот. „Се слушаше само нејзиниот крик: ‘Мамо, бегам за да си го спасам животот’. Тие први часови беа неиздржливи, веднаш тргнав кон училиштето“, раскажува жената за порталот 5min.at.
Неизвесност владее и кај семејството на тинејџерка за која се верува дека е меѓу повредените. „Ми рекоа дека ја однеле во болница, но никој не ми кажува каде е и дали е стабилна“, раскажува нејзината сестра, која добила информација од друг ученик дека видел како болничари ја внесуваат во амбулантно возило.
Полицијата продолжува со увидот за да утврди како напаѓачот дошол до оружјето и дали имал соучесници, а локалните власти најавија поддршка за семејствата на загинатите и повредените. Трагедијата предизвика бран реакции низ цела Австрија, а училишните установи во регионот ги заострија безбедносните мерки додека јавноста очекува нови детали од истрагата.
