Skip to content
Илон Маск ја подигна влоготoт во судската пресметка со OpenAI и Microsoft на ниво што ги надминува класичните корпоративни спорови: во најновиот судски поднесок бара обештетување во распон од 79 до 134 милијарди долари, тврдејќи дека компаниите оствариле „неправедни добивки“ благодарение на неговата рана финансиска и институционална поддршка при формирањето на OpenAI.
Според поднесокот, Маск аргументира дека OpenAI стекнал „wrongful gains“ меѓу 65,5 и 109,4 милијарди долари, а Microsoft меѓу 13,3 и 25,1 милијарда долари – бројки што ги врзува со тоа дека во клучната почетна фаза тој, наводно, обезбедил околу 38 милиони долари (околу 60% од стартното финансирање), помогнал во регрутирање кадар, отворање контакти и градење кредибилитет. Проценките се темелат на анализа на финансискиот економист К. Пол Вазан, наведен како експерт сведок на Маск.
Суштината на спорот е старата расправија околу „мисијата“ на OpenAI. Маск, кој беше коосновач во 2015, а замина во 2018 година, тврди дека организацијата се оддалечила од првичниот непрофитен јавен интерес и дека лидерството го водело процесот кон профитна структура и договори што, според него, го поништуваат основачкиот договор и ветувањата. Во меѓувреме, OpenAI ја заврши трансформацијата во профитна „public benefit corporation“ во октомври 2025, што дополнително ја заостри линијата меѓу „мисија“ и „пазар“.
Од друга страна, OpenAI јавно ја нарече тужбата „неоснована“ и дел од кампања на вознемирување, додека Microsoft, како клучен партнер и финансиер на OpenAI, во судските постапки тврди дека нема докази оти „помагал или поттикнувал“ незаконитости. Двете компании бараат судот да го ограничи или исклучи сведочењето на Масковиот експерт, оценувајќи дека проценките за „пренос на милијарди“ се непроверливи и потенцијално манипулативни за порота.
Американската судијка Ивон Гонзалез Роџерс во Оукленд оцени дека има доволно спорни факти за случајот да оди пред порота, со судење што се очекува да започне во април 2026. На маса ќе бидат и прашања што не се само финансиски: дали лидерството на OpenAI давало уверувања дека непрофитната рамка ќе остане, дали Маск поднел тужба навреме и дали „неправедната добивка“ воопшто е мерлива на начин што може да издржи судска проверка.