Масовен напад со нож во воз во Англија: двајца уапсени

Британската полиција уапси двајца осомничени по синоќешниот масовен напад со нож во воз на линијата Донкастер–Лондон, запрен на станицата Хантингдон. Осомничените се мажи на 32 и 35 години, двајцата родени во Обединетото Кралство; приведени се осум минути по повикот до службите за итни случаи. Полицијата засега не го третира случајот како тероризам, а истрагата ја води Британската транспортна полиција со поддршка од антитерористички тимови.

Инцидентот се случил околу 18:25 по локално време во воз на LNER кон „Кингс Крос“. Според првичните податоци, повредени се десет лица; деветмина во еден момент имале повреди опасни по живот, а утринава две лица остануваат во критична состојба. На местото интервенирале вооружени полициски единици и повеќе екипи на итна помош, вклучително и хеликоптерска амбуланта.

Полицијата наведе дека едниот осомничен е црн британски државјанин, а вториот е со карипско потекло; двајцата се уапсени под сомнение за обид за убиство. Британскиот министер за одбрана Џон Хили изјави дека инцидентот е изолиран, а безбедносните служби немаат индиции за терористички мотив.

Сведоштва од патници опишуваат сцени на паника во вагоните по минувањето низ Питерборо; возот бил сопрeн во Хантингдон, а дел од патниците подоцна биле транспортирани кон Лондон со автобус. Станицата и дел од блискиот сообраќај беа привремено затворени за увид.