Skip to content
Од СДСМ ја информираат јавноста дека премиерот Христијан Мицкоски само за едно видео објавено на социјалната мрежа ФБ плаќа по 600 евра. Од таму велат дека тој јавно говори дека не пробал цреши, но затоа пак, тајно, месечно троши илјадници евра за реклами на Фејсбук.
„Додека луѓето едвај врзуваат крај со крај поради огромните поскапувања, додека нема пари за поголема минимална плата и додека луѓе умираат бидејќи нема лекови Мицкоски фрла илјадници евра за лајкови. Само една реклама на профилот на Мицкоски чини 600 евра, многу повеќе од минимална плата. Тоа што Мицкоски ги убедува граѓаните дека им е доволно за цел месец го троши на Фејсбук за неколку дена. Каков безoбразлук, какво лицемерие. Да се фрлаат илјадници евра за реклми на Фејсбук покажува дека на оваа власт не и се важни граѓаните“, велат од СДСМ.
Според, опозициската партија, ‘за Мицкоски поважно е да фрла илјадници евра за лајкови, да се слика и да се снима, а за граѓаните баш му е гајле, нека се мачат како ќе го поминат месецот’.
Премиерот Христијан Мицкоски неодамна истакна дека пресметката на минималната кошница треба да се базира на објективни параметри и дека во неа има одредени нелогичности.
„Ја добив таа методологија и ја читав, и забележав работи кои навистина ми делуваат многу чудни. Еве, јас во јануари дел од овие производи не ги пробав – диња, лубеница, грозје, цреши, кајсии, праски. Не испив 250 грама лименка нес кафе, не пушам цигари, а таму се и цигари. Малку е нелогично да имате цигари во минимална кошничка“, изјави Мицкоски.
Разговорите меѓу Владата и Синдикатите за усогласување на минималната плата не резултираа со договор, а работниците очекуваат покачување во март. Синдикатот претходно побара минималецот да изнесува 450 евра, укажувајќи дека четиричлено семејство не може да ги покрие основните месечни трошоци со помалку од 1.000 евра. Македонскиот минималец останува меѓу најниските во регионот.
