Министерството за здравство со 80.000 вакцини ќе ги штити ризичните групи од сезонски грип, неделава пријавените ќе добијат СМС

Министерството за здравство информира дека годинава набавило 80.000 дози четиривалентна вакцина против сезонски грип од реномираниот производител „Абот“ од Холандија. Вакцините ќе бидат дистрибуирани низ јавните здравствени установи и ќе овозможат заштита на ризичните групи население, вклучувајќи повозрасни лица над 65 години, лица со хронични заболувања, здравствени работници, бремени жени, деца од 6 месеци до 5 години, како и лица сместени во установи за социјална заштита и вработените во овие установи.

Вакцинацијата ќе се спроведува на 35 вакцинални пунктови низ државата, од кои пет се во Скопје. Граѓаните што се пријавиле за бесплатна вакцинација ќе бидат известени со СМС-порака за терминот на вакцинацијата. Министерството потсетува дека вакцината претставува најефикасна превентивна мерка за заштита од сезонски грип.