Skip to content
Кандидатот на СДСМ за градоначалник на Гази Баба, Влатко Митовски, оцени дека четиригодишното управување на актуелниот градоначалник Бобан Стефковски и ВМРО-ДПМНЕ донело „разочарувања, незаинтересираност и нула исполнети ветувања“, а општината „од мотор на локален развој станала пример за партизација и урбанистички хаос“. „Четири години кои наместо развој и конкретни проекти, донесоа само празни зборови, нефункционална администрација и урбанистички хаос,“ изјави Митовски, додавајќи дека „партиските интереси се ставени пред интересот на граѓаните“.
Во прилог на ваквата оценка, тој потсети на повеќе точки од изборните програми за кои, како што рече, нема реализација. Според Митовски, пред четири години било најавено подигање на четири нови градинки во општината, но ниту една не е започната. Најавата за половина милион нови дрвја, „освен ако не се бројат саксиите пред општината“, останала без видлив резултат, а проектите за нова фекална мрежа, гасификација и топлификација – проценети на над милијарда денари – и по четири години се „само во фаза на најава“.
Митовски посочи и дека ветените подземни контејнери, културни центри, спортски сали, паркови за миленици и здравствени амбуланти не се реализирани, како и дека индустриската зона останала на ниво на идеја. „Овие 33 неисполнети ветувања не се само промашени инвестиции, туку разочарувања на граѓаните,“ нагласи тој.
Тој притоа додаде дека, за разлика од проектите што не се остварија, „испорачани“ биле повисоки давачки за домаќинствата. „Денеска граѓаните на Гази Баба плаќаат поскапи сметки за вода, смет и канализација,“ рече Митовски, оценувајќи дека улиците се нечисти, инфраструктурата нефункционална, сообраќајот хаотичен, а „урбанистичките дивеења“ секојдневие.
Во завршницата, кандидатот на СДСМ порача дека претстојните локални избори се шанса за „крај на четиригодишниот застој и нова надеж“. „Гази Баба заслужува општина што работи, создава и гради. Време е за промена, чесност и работа во интерес на граѓаните,“ рече Митовски.
