„Синоќа во Чаир се случи уште едно пукање. Со дури четири прострелни рани, тешко е повредено младо момче од 19 години, кое се бори за живот. Ова е втор пат за 1 месец млад човек да биде жртва, во септември исто така од пукање беше повредено уште едно младо момче“, истакна на прес конференција портпаролката на СДСМ Богданка Кузеска.
Кузеска посочи дека состојбата со безбедноста на улиците е алармантно влошена и дека тоа е учинокот на Владата на Мицкоски во изминатите 100 дена.
„Со Тошковски и ВМРО-ДПМНЕ улиците станаа Див Запад, пукање има речиси секој ден, на секој чекор. Криминалните пресметки се во голем пораст, наместо ред и поредок се случува хаос. Неказнивоста и неефикасноста на МВР е празник за криминалците кои немаат страв од Тошковски и прават што сакаат“, порачуваат од СДСМ.
Кузеска потсети дека со Тошковски на чело на МВР досега има над 20 случаи на употреба на огнено оружје или остар предмет, околу 10 убиства и обиди за убиства.
„Се случи убиство на бизнисмен кај Мавровка, обид за убиство во во Арачиново, убиство на доктор во населбата Железара, пукање и убиства во Синѓелиќ, во Чаир, Батинци, Тетово, на Пластичарска улица….И нема разврска на овие инциденти ниту на убиствата. Едвај еден случај е расчистен“, укажа портпаролката на СДСМ.
Криминалците не се плашат од Тошковски, тој не може ниту полицајците да ги заштити, велат од опозициската партија.
„Само последните два месеци има десетина случаи на запалени автомобили на инспектори, началници, полицајци. Такви беа случаите со запаленото возило на Началникот на полицијата во Струга, на инспектор во Виница. Сторителите се уште се непознати, одговорност нема“, беше потенцирано на прес конференцијата.
Од СДСМ велат „од затворите кој сака бега и кога сака излегува. Избегаа 10 затвореници од затворот Шутка. Одговорност нема.
„Лани, 2023 година Македонија беше прогласена за најбезбедна земја на Западен Балкан од страна на Глобалниот индекс за мир, а сега, само 100 дена во ВМРО-ДПМНЕ состојбата е алармантно влошена“ сметаат во СДСМ.
Тие го повикаа премиерот после сите скандали, после сите овие убиства, пукања, криминални пресметки без разрешница, да реагира и да го смени Тошковски, но очигледно го штити, рече Кузеска.
„Досега немало понеспособен министер за внатрешни работи. Ако Тошковски ја сака Македонија ќе си поднесе оставка. Бараме оставка од Тошковски веднаш“, истакна на прес конференција портпаролката на СДСМ Богданка Кузеска..
