Skip to content
Смртта на 58-годишниот Самир Доловац од Нови Пазар отвори сериозни прашања за постапувањето на полицијата, откако неговото семејство и сведоци тврдат дека бил брутално претепан за време на полициска интервенција, а надлежните институции реагирале дури по неговата смрт.
Доловац беше приведен на 31 октомври, а десет дена подоцна беше хоспитализиран во Клиничкиот центар во Крагуевац со крварење на мозокот. Почина на 21 јануари. Дури по неговата смрт, Министерството за внатрешни работи на Србија се огласи со соопштение во кое тврди дека полицијата постапувала „во согласност со прописите“.
„Нѐ удираа со раце, нозе, со сè што стигнаа“
Соседот и пријател на починатиот, Бесим Мавриќ, кој исто така бил приведен таа вечер, за порталот Nova.rs раскажува сосема поинаква верзија од онаа на полицијата.
„Седевме во ресторан, имаше музика, ништо необично. Одеднаш влегоа полицајци и дојдоа директно кај нашата маса. Побараа лични карти, па почна малтретирање – ‘стани, седи, стани’. Во еден момент го фатија Самир грубо за рака. Кога прашав што прават, почна тепањето“, раскажува Мавриќ.
Според неговите зборови, полицајците ги удирале со раце и нозе, ги навредувале и им ставиле лисици, по што тепањето продолжило.
„Нѐ удираа од сите страни. Мене ме соблекоа, ме оставија речиси гол. Самир го видов бос во ходникот – патиките му останале во ресторанот. Го однесоа, а јас не знаев што ќе се случи со него“, вели Мавриќ.
Официјалната верзија и сомнежите
Од МВР тврдат дека Доловац и Мавриќ биле „видливо алкохолизирани“, дека ги навредувале полицајците и дека било употребено „средство за врзување“. Според нив, при приведувањето не биле забележани повреди, а Доловац не се пожалил ниту кај лекар, ниту кај адвокат.
Но, десет дена подоцна, тој бил примен во болница со тешки повреди опасни по живот, што фрла сериозен сомнеж врз официјалната верзија.
Тишина на институциите
И покрај тоа што болницата пријавила случај со тешки телесни повреди, истрага не била покрената навреме. Дури по смртта на Доловац, МВР соопшти дека Секторот за внатрешна контрола ќе го разгледува случајот.
Градоначалникот на Нови Пазар, Нихат Бишевац, побара истрага, но тоа се случи два месеца по инцидентот.
„Ќе одам до крај, па и куќата да ја продадам“
Мавриќ вели дека нема да се откаже од барањето правда:
„Не знам зошто нè нападнаа. На масата имаше и Срби и Бошњаци. И полицајците беа Бошњаци – значи не е национално. Но нешто не е во ред. Ќе одам до крај, ако треба ќе ја продадам и куќата, ама вистината мора да излезе“.
Смртта на Самир Доловац повторно го отвори прашањето за полициската бруталност во Србија, за неказнивоста и за начинот на кој институциите реагираат кога жртвите не можат повеќе да зборуваат.