Награди за Народно Позориште Лесковац, Никола Ристановски, Сузана Грујиќ и Арбен Кумбаро на Меѓународниот театарски фестивал „Отело“

Со доделувањето на наградите на пригодната церемонија и изведба на претставата „Први и последни“ на Народниот експериментален театар од Тирана, синоќа во Гостивар заврши седмото издание на Меѓународниот театарски фестивал „Отело“.

Жирито на фестивалот, Арта Мучај, Ѓорѓи Нешкоски и Адем Карага признанието за најдобра претстава го додели на „Домот на Бернарда Алба“ на Народно Позориште Лесковац во режија на Андреј Цветановски. За најдобар актер е прогласен Никола Ристановски за улогата во „Народен непријател“ на Македонскиот народен театар (МНТ), а за најдобра актерка Сузана Грујиќ за остварувањето во претставата „Домот на Бернарда Алба“ на Народно позориште Лесковац. Наградата за најдобар режисер ја понесе Арбен Кумбаро за „Народен непријател“ на Тетовски Театар.

Годинава во големата сала Центарот за култура „АСНОМ“ од 9 октомври во шест вечери беа изведени претставите на Македонскиот народен театар, Скопје (МНТ), Драмскиот театар „Рачо Стојанов“ Габрово-Бугарија, Косовскиот народен Театар, Приштина-Косово, Тетовскиот театар – Тетово, Народниот театар Лесковац-Србија и Народниот експериментален театар од Тирана-Албанија.