Најголемиот измамник со криптовалути во Турција пронајден мртов во затворска ќелија

32-годишниот Фарук Фатих Озер, поранешен извршен директор на пропаднатата крипто берза Thodex, е пронајден мртов во својата затворска ќелија во градот Текирдаг, на западот од Турција, објави државната телевизија ТРТ.

Според првичните информации, се истражува можноста за самоубиство. Телото на Озер било откриено од затворските чувари за време на утринската проверка. Турските обвинители наредиле детална истрага, вклучувајќи испрашување на персоналот и анализа на безбедносните камери. Телото е испратено во Институтот за судска медицина во Истанбул на обдукција, за да се утврди точната причина за смртта.

Еден од најголемите финансиски скандали во турската историја

Озер беше централна фигура во еден од најголемите финансиски скандали во историјата на Турција. Тој беше уапсен во Албанија во август 2022 година, по сензационално бегство со кое се обиде да избегне одговорност за измама на илјадници инвеститори преку крипто-платформата Thodex.

Според обвинението, Озер проневерил над 2 милијарди долари средства, оставајќи зад себе хаос и илјадници оштетени корисници. По неговата екстрадиција во Турција, беше осуден на 11.196 години затвор за организирана измама, перење пари и водење криминална организација.

Иако тврдеше дека пропаѓањето на платформата било резултат на сајбер-напад, судот го прогласи за виновен по сите точки од обвинението.

Повик за независна истрага

Неговата ненадејна смрт предизвика бројни реакции во турската јавност, а дел од коментаторите бараат независна истрага, сомневајќи се дека можеби не станува збор за самоубиство, туку за замолчување поради сознанијата што Озер можел да ги има за финансиските мрежи што оперирале преку Thodex.