Најмалку 195 луѓе повредени во експлозија во Иран

Најмалку 195 лица се повредени во силна експлозија и пожар што го погоди иранскиот пристанишен град Бандар Абас, кој се наоѓа повеќе од 1.000 километри јужно од Техеран, соопштија официјални лица и државните медиуми.

Иранската царинска управа потврди дека експлозијата се случила во саботата во контејнерскиот двор Сина, кој е под надлежност на Организацијата за пристаништа и поморство.

Директорот на организацијата за управување со кризи во провинцијата Хормозган, Мехрдад Хасанзадах, изјави за државната телевизија дека сите повредени се пренесени во здравствени установи. Тој исто така нагласи дека безбедносните служби претходно го посетиле местото на инцидентот и издале безбедносни предупредувања.

Претходно, официјален претставник на Управата за пристаништа и поморство на Хормозган, Есмаил Малекизаде, изјави дека експлозијата се случила во близина на пристаништето Шахид Раџаи.

На снимките објавени на социјалните мрежи може да се види огромен облак црн дим и огнена топка што се подига од местото на експлозијата. Други снимки покажуваат оштетени згради и возила, додека граѓаните им помагаат на повредените и проверуваат штета на имотот.

Пристаништето Шахид Раџаи најчесто се занимава со контејнерскиот транспорт, а содржи и нафтени резервоари и други петрохемиски објекти, јавува Ал Џазира.