НАСА праќа луѓе на месечината во Февруари

Првата американска мисија со екипаж околу Месечината по повеќе од половина век доби поамбициозен распоред: „Artemis II“ е насочена кон прозорец што се отвора на 5 февруари 2026 и трае до април, потврдија функционери на НАСА на брифинг во Центарот Џонсон во Хјустон.

Финалната рамка и натаму гласи „не подоцна од април 2026“, но агенцијата остави простор за порано лансирање доколку сите безбедносни и технички критериуми бидат исполнети. Мисијата ќе трае околу десет дена и ќе испрати четворица астронаути — Рид Вајсман, Виктор Гловер, Кристина Кох и Џереми Хансен — во орбита околу Месечината и назад кон Земјата, како генерална проба за идното слетување во „Artemis III“.

Подготовките на системите се во завршна фаза. Екипажот вчера и формално го крсти вселенското летало: „Integrity“ е името на капсулата што ќе ги однесе околу Месечината — симболичен избор што, според НАСА, ја носи идејата за доверба и за огромниот интегриран напор на илјадници луѓе и стотици илјади компоненти зад проектот.

Иако „Artemis II“ не вклучува слетување, нејзиниот успех е клучен за следниот чекор: „Artemis III“, за кој е предвидено спојување во месечева орбита со лунарниот систем за слетување на SpaceX. Токму тука дел од советничките тела за безбедност предупредуваат на тесни грла: трансферот на криогено гориво и подготвеноста на Starship-лендерот се проценуваат како значително критични, што би можело да го турне рокот за слетување по 2027.