НАТО ќе ја нападне Русија ако Москва удри на Балтикот: предупредување од естонскиот министер

НАТО ќе ја нападне Русија ако Москва ги нападне балтичките земји, порача естонскиот министер за надворешни работи Маргус Цахкна во изјава дадена на маргините на Минхенската безбедносна конференција, објаснувајќи дека Естонија, Латвија и Литванија ќе ги одбијат напаѓачите и потоа ќе следи „длабок“ контранапад на руска територија.

Цахкна, според објавеното, вели дека планот не е пасивно чекање на сојузничка реакција по евентуална инвазија, туку брзо спротивставување и пренесување на борбените дејства кон територијата на напаѓачот. Тој тврди дека затоа балтичкиот регион ги забрзува инвестициите и капацитетите и дека се инвестира 5% од БДП во одбрана.

Во истата порака, естонскиот министер ги отфрла стравувањата дека Русија би можела брзо да освои територија на исток и оценува дека сценаријата кои ја прикажуваат Балтикот како лесна цел се застарени, бидејќи државите значително ги зголемиле одбранбените вложувања и, како што наведува, се способни да ѝ се спротивстават на Русија.

Како пример за спорните проценки, се посочува воена симулација за Литванија организирана од германскиот весник Die Welt, која предизвикала контроверзии затоа што во неа Русија се појавила како јасен победник, а НАТО бил парализиран од неодлучност. Во сценариото, се наведува дека САД одбиле да го активираат Член 5, Германија не успеала да им се спротивстави на руските сили и покрај бригада стационирана во Литванија, а инвазијата била оправдувана со „хуманитарна криза“.

Во симулацијата, според пренесеното, руските трупи го окупирале литванскиот град Маријамполе и потоа презеле контрола врз стратешки важниот превој Сувалки, по што исходот ги разгневил балтичките лидери бидејќи било сугерирано дека не би можеле да се спротивстават на инвазија.